الجمعة، 17 أبريل، 2009

تــــــــــــاج ..




بسم الله الرحمـــن الرحيـــم ..

تاج تلقيتـــــــــــه من الحبيبة أم البنيــــن ..
لها كل الحب فى الله ..

اسمك؟

المستعـــار : أريج ..


المشهور بيه وسط اصحابك؟

فى النت : أريج


سنك؟

21


مجال دراستك؟

تربيـــة لغــة عربيــة

اسم مدونتك؟

حنيـــن ..


صورتك الرمزية فى المدونة بتعبر عن ايه؟

يمكن بحب صور كتير أوى..
بس صورتى حاليا الأحب لقلبى..
لأنها لأحب الأماكن لقلبى..
لمكـــان لما بزوره بحس إنى اتولدت من تانى
صورتى الرمزيــة لبيت ربي ..


هل فكرت فى اغلاق المدونة ؟ والسبب؟

لا ..
والسبب إنى بحبهـــا رغم هدؤها ..
مش متعودة أرد فى المدونـــات لكن بتابع من بعيد..
وده مخلى زوار مدونتى مش كتيـــر ..
لكن بحبها ..


ايه رد فعلك لو حد قل ادبه فى تعليق ؟

أكيد هحذفه بدون ما أرد عليــه..

أسوأ مدونه؟

أى مدونة تحمل هدف سىء
أى مدونة تهاجم ديني ..
أى مدونة تحمل ألفاظ وافكــار وصور خارجة..


هيحصل ايه للايميل بعد ماتموت؟

حتما سيغيب مع غيــابي..
فاللهم حسن الختــام ..وعمل يرضيك
وكلمات ترقينى للجنـــة
اللهم آميـــن ..

اديت الباسوورد لحد قبل كدة؟

لأختى الحبيبة..


السفر بالنسبة لك ايه؟

جايز مشقة ..
بس يمكن أنا بحب التغيير ..
السفر إذا كان للعمرة أُفضل أن يطول..
لتزداد حسناتى بقدر المشقة..
ويزداد شعور يتعلق بمكــان أحبه ..


الموود بتاعك ايه ؟

متقلب غالبا كما كل بنات حواء..
ويسكن ويطمئن حين الوقوف بين يدى الله
وفى قربه ..


بتعمل ايه فى وقت فراغك ؟

عامة أوقات فراغى تختلف فيها أفعــالى
لا أستطيع تحديد ما أفعله بها تقريبا
ولكنها تستغل فى جميع نواحى الحياة


الأكلة المفضلة ؟

بحب كذا حاجة..
ممكن البيتزا أو أى شئ تستخدم فيه مكوناتها
زى الجلاش والكريب


الصفات التى اخذتها من والدك؟

حب النــاس


الصفات التى اخذتها من والدتك؟

التســامح


اكتر ست حاجات بتكرههم ؟

الكذب
سوء الظن
بذائة اللســان
غياب الحياء
الضوضاء
سوء الخلق


اكتر ست حاجات بتحبهم ؟

البحر
الخضرة والطبيعة
قطرات المطر
التأمل
الشموع
رقة الطبع


شخصيتك نوعها ايه ؟

السؤال ده ممكن يجاوبه أبى أوأمى أو إخواتى
أو صديقاتى


لماذا دخلت عالم التدوين من الاساس؟

بحب أكتـــب..وأجمع كتاباتى فى مكــان خاص بى..
يعنى زى كشكولي الإلكترونى كده :)


احلى جملة قيلت فى وصف مدونتك؟

مش عارفة بالضبط
بس ممكن يكون انها بتخاطب الروح والقلب ..


اهمية التعليقات بالنسبة لك؟

تسعدنى إن كانت من أحبتى..
وإن كانت تحمل إضافة ..أو نقد أو تقييم
أو تخبرنى بنجاح تدوينتى فى تأثيرها عليهم ..


احلى بوست كتبته؟ ضع اللينك ثم اذكر لماذا؟

هو الأحلى عندى لأنه عن مكــان بحبه
وهو رحلة إلى أرض الطهــــر


افضل مدونة قرأتها؟

مدونــــات كتير..
يمكن أغلب المدونات اللى فى المفضلة عندى
بس يمكن أحبهن لقلبي
مدونة الشيشان فخر الأمـــة


افضل بوست قرأته؟

مش قادرة أحدد بالضبط..
لأن فى تدوينــات كتير عجبتنى وأثرت في ..


الشغل بالنسبة لك ايه؟

عــامة من وجهة نظرى المرأة المتزوجة أهم أعمالها منزلها ..
وإن كنت أدرك أهمية عمل المرأة كطبيبة ومعلمة وكل عمل تحتاجها فيه بنات جنسها
عن نفسى حتى تلك الفترة تفرغى..إلا إنى أفضل طلب العلم
وإن كنت أحب مجال عملى كثيرا ..فى أثناء التدريب العملى تبع جامعتى
عند تدربنا بالمدارس..كنت أحب الفتيات كثيرا وأحب الشرح لهن وسرعة تأثرهن بالنصائح
ونقاء مشاعرهن وتعلقهن بى..
ولكنى ربما لأنى طالبة تدريب ..كان بإمكـــانى الهروب من حجرة المدرسين
فى يوم التدريب ..لأنها أكثر ما أكره ..
غيبة ونميمة ..وضغائن ...والكثير مما لا أستطيع العيش فيه فترة طويلة
رغم شدة حبى لمهنتى وشدة إدراكى أن للمعلم تأثير قوى فى الطالب
وشعورى بسعادة عندما ألمح غرس طيب غرسته بهن يؤتى ثماره
إلا أنى أخشى جو الضغائن وربما لا أستطيع التعامل فيه
فكيف بى وأنا معلمة ملزمة بالتواجد فى هذا الجو ..ويحكمنى سنى
فى عدم توجيه نصائح لمعلمة فى مثل عمر أمى..
ربما أحتــاج قوة لمواجهة هذا..


لكن لا أؤمن بعمل لى بعد الزواج سوى منزلي..بإذن الله


الانترنت بالنسبة لك ايه ؟

تعلم ..وتقرب لله ..ودعـــوة ..


تمرر التاج ده لمين ؟

لكــل من يقرأه ..